Shadow 's Blog

六月二十五日（陰）：

今日六點九起身，但係小弟六點先瞓得著，成晚係做最後功課，跟住六點九起身，叫醒老豆，叫埋Crystal咁就一齊向珠海機場出發啦。

其實我都幾擔心，話哂呀風神五六點先登陸深圳，好怕今日飛唔到，飛唔到就大獲了！一路上都好大雨，而且亦開始有小小水浸，坐左差唔多個半鐘車，終於平安去到珠海三灶機場（多謝爸爸 :D）。

去到就搞托運嗰啲野，見時間尚早就去大家樂食埋野先，老實講我覺得重平過拱北，火腿午餐蛋加塊多士，炸菜肉絲米再加多杯奶茶先係十六蚊，重唔抵咩？

跟住未又係嗰啲，唔講咁多啦，班機delay 左大約半個鐘，最後順利升空往今次既目的地海南島出發lu。

飛行時間五十分鐘，無靚空姐。

到海口美蘭機場，媽咪同佢朋友就係出邊等，車左我同Crystal去食海南島既第一餐海鮮，真係又平又好食！！同嗰死人康記真係差得遠！

食完媽咪就帶我地上高速兼醒左箱生果比我地沿路食，放低佢地我地就向三亞直奔啦！

一路上，車唔多亦唔快，但係我就極眼瞓，加上啲局部地區性雷雨，行左差唔多三個鐘先到亞龍灣（去到好似四點幾差唔多五點），入亞龍灣嗰條路就以經比左個好好既印象我地，今晚我地住既酒店係假日，去到check-in放低行李，就換拖行去踏浪啦，亞龍灣真係好靚，啲沙好幼，水好清，不過嗰日都幾大浪，而且身為澳門人，見到海唔會有東北佬嗰種莫明奇妙既興奮，所以都係踏下浪，踼下水，影下相就番上酒店，執下裝備就攞番車出發去三亞市區（亞龍灣距離市區約二十多公里）。

今晚既晚餐就係去網上極之出名既春園海鮮廣場，我地捒左六排六號，因為網上話佢好似係廣東人，所以就捒佢啦，個［店小妹］就帶左我地去捒海鮮，點左一斤蝦，一斤花甲，五隻帶子，兩隻海膽同埋半隻文昌雞，連加工費都唔駛百六，係灣仔我諗最少都二三百；食完就急急腳走，渣車遊下車河，睇下三亞市區，行下超市咁就番番酒店瞓覺lu。

六月二十六日（晴加好熱）

成十點半先起身，check-out 出發往蜈支洲島碼頭，行呀行行左成半個鐘，一心去潛水但係要旅行社去簽單先有平價，最後就捒回程會經過既分界洲島潛水。咁好啦，今日無得潛就去南山睇下囉，南山話自己係［福如東海，壽比南山］個南山，但係以我有限既文法知識，東海係山東，南山邊有可能係海南，所以佢呢啲野我都係當佢老吹。南山有全世界最高既海上觀音，成百米高架，加上全身白色，都幾靚，而且佢入邊既齋真係好正，可能我平時唔食開齋唔識野，但佢啲梅菜扣肉我真係壞疑係用豬肉做既，如果唔係點會咁好食！？跟住都係嗰啲，入去拜下神，香我就無燒啦。＊小弟係到建議大家唔好慳嗰廿蚊，唔坐佢部觀光車係大熱天時下真係會好後悔！

拜完神睇完觀音就渣車番亞龍灣，其間有段小插曲係離開南山無幾耐，一路開車既時候突然有隻黑蚊蚊既雞跑出黎，我唔想無啦啦洗車所以就重brake加避開佢，最後都停得切，如果唔係就有排洗啦 L，唔知係唔係啱啱入廟嗰陣唔記得唔可以踩啲門檻，搞到即時當黑。。。。番黎要燒下香先得。

番到亞龍灣，今晚入住既係鉑爾曪渡假酒店，今年新開加法國佬做老闆，所以要成千六蚊晚，但係，點解我地都捒佢呢？因為佢間酒店房入邊有私人泳池，真係裸泳都無人理你呀！咁話哂成千六蚊，就成間係酒店房到游下水，睇下電視食下生果，晚飯都係酒店解決，實行千六蚊洗盡佢呀嗎！

六月二十七日（晴）

琴晚掛住睇電視，搞到十一點都唔願起身，打去FO問佢late check-out 幾點，佢就話一點，咁都okay啦。咁就換衫起身走去check-out攞車走lu。向今日目的地分界洲進發。一路渣左一個鐘，以為分界洲係陵水落，點知一落就唔對路，點解好似未開發咁既，走去油站問人，佢地話一路再向海口行就會見到分界洲島個牌，咁就信佢，果然無幾耐就見到。

去到泊好車，換左泳衣就坐船出去。渣船嗰條友好似痴左咁渣得勁快，但係因為勁大浪，好似坐緊過山車咁J。去到就換潛水衣、聽嗰個好似無聽既講解就上船出去第二個浮排到準備潛水。去到上鉛塊、氧氣筒就落水啦。基本上唔識游水都唔怕，因為你都無會游既。

大約潛三十分鐘，老實講唔太靚，好多珊瑚都死哂，教綀係咁想我影相，我睇到啲珊瑚咁就梗係唔影啦。摸下海膽、海參、珊瑚就上番水lu。不過最surprise 係嗰浮排有養海豚同海龜，不過佢地比人困住好慘咁…..

食下野，就上船番去攞車番海口啦。差唔多到海口時勁眼瞓，叫Crystal渣左五分鐘。

去到接埋媽咪同佢個frd 就一齊去食海鮮。發覺海南啲待應都係黑口黑面，好似欠左佢地咁。食就游陣車河番酒店啦。

六月二十八日 （雨）

今日要搭中午機番珠海。一早起身天陰陰，係酒店飲茶，飲到最尾就落大雨啦。羅車去市場買啲生果拎番屋企。去到機場、寄艙、check-in、同媽媽道別咁囉。班機因為珠海落大雨delay左三個鐘….. 悶到百佳… .

番到珠海搭機場快線番拱北等老豆車我地番入澳門（係珠海走時唔知係唔係眼花，睇到有部國泰係珠海機場起飛）。

就係咁，一個三日三夜既行程就完結。